好無謂既「點解」

Posted in: 朋友 @ 2008年03月17日

我舊同事既一段blog~ 睇到我笑到ka ka聲~

************************************

點解…. 點解我身邊 D人咁鐘意問點解??

(早上篇)
點解你今日咁早返工呀??
(你遲到… 唔代表全世界都要陪你遲呀!!)
點解你今日咁早返工又叫我起身呀??
(好呀.. 我半夜叫埋你疴夜尿呀!!)
點解你今日咁早返工都唔幫我叫定早餐??
(你啞ga??)
點解你今日咁早返工都唔幫我打埋咭??
(你唔識打咭呀?? 我教過你好多次喎… 點解你學極都唔識?)
點解你今日咁早返工都唔幫我CUT 報紙稿呀?? (註釋:做地產SALES 每朝 CUT稿係好重要.. 而且係必須要做的事!!)
(因為我無地產牌呀!!)

(中午篇)
點解差唔多成12點都唔問我哋去邊度食飯呀??
(食飯都要問? 喂!! 你陣間12點半洗唔洗去疴尿呀!?)
點解差唔多成12點都仲坐係度… 唔郁呀??
(既然係坐係度.. 你想我點郁呢!!)
點解差唔多成12點都唔去明將… 扒王之王.. 泰國菜館… 或者稻香搵位??
(因為我今日都自己一個食LUNCH!!)

(下午篇)
點解你今日咁早/遲上來呀?? (註釋: 因為我負責兩間分行.. 早上去完一間之後.. 下午要去另外一間分行)
(因為我遲你哋又覺得我遲… 我早你哋又覺得我早)
點解你同下面的同事食飯唔同我哋食飯呀?
(因為我同你哋食飯… 下面D同事又覺得唔同佢哋食啦!!)
點解下面間分行有 SCANNER. 我哋呢間無呀??
(你有需要.. 自己攪掂啦)
點解下面間分行個電話號碼咁靚.. 我哋呢個咁難記??
(記8個數字都記唔到… 其實係你個人問題)

(放工篇)
點解你今日咁準時走呀??
(合約寫明9:30-18:00係我的 OFFICE HOURS)
點解你今日要OT咁慘呀??
(我OT都係拜你哋所賜)
點解你今日搭小巴… 唔搭巴士呀?? 係唔係中咗六合彩呀??
(如果我搭小巴係因為中六合彩… 咁D 獎金咪得幾蚊)
點解你今日唔約阿JUNE一齊走呀?? 你唔怕悶咩?? (註釋: JUNE 係我同事.. 大家都係住馬鞍山)
(唔悶呀!! 成車人都陪我放工呀..)
點解你今日自己一個走呀?? 你男朋友呢?? 鬧交呀??
(係呀!! 分手個日請你飲呀!! 記得做人情呀!!)

(朋友篇)
點解你咁遲先搵我呀??
(我無約你ga>.<.. 你又點知我遲呀??)
點解你打親來都無好嘢??
(就係因為你係我朋友.. 我先有嘢搵你幫手呀!!)
點解你打親俾我.. 我都唔得閒??
(我睇唔到你喎… 如果我知你忙都唔會搵你啦!!)
點解我約親你.. 你都話無時間??
(咁你下次咪唔好搵人啦.. 人哋都拒絕咗你咁多次啦!!)
點解次次都係約係XX等呀?? 其他地方唔得咩??
(香港地有幾大呀??)
點解次次都係我早過你到?
(因為我遲.. 所以你咪早啦!!)
點解頭先你唔阻止我買/食咁多喎… 你都唔係FRIEND唻ga?!
(如果陣間話我阻止你買/食… 又話我唔夠FRIEND喎.. )

(愛人篇)
點解你口口聲聲話愛我… 其實都無呀??
(如果你話無呀… 我做俾你睇啦!!)
點解你應承我同我去XX… 都未同我去呀??
(你每日都想我同你去唔同的地方… 俾多十年時間都唔夠啦…)
點解你唔幫我拎袋啫呀??
(你已經買到我兩隻手都拎唔哂… 我仲點幫你揹手袋呀?)
點解你行街的時候..唔拖我隻手呀??
(如果你想我拖你隻手.. 咁我要掉哂手上的戰利品啦!!)
點解你次次都遲到呀??
(其實我15分鐘前已經到咗.. 打俾你… 你啱啱先出門口… 咁我就去附近商場行吓啫)
點解你做錯事.. 都無悔意呀??
(因為我講完SORRY之後… 你就會話除咗SORRY 仲識講咩喎!!)
點解冬天你同我食雪糕呀?? 夏天同我打邊爐呀??
(因為次次問親你食咩… 你都無意見… 仲叫我楂主意)
點解你唔珍惜我喎?
(既然珍惜你… 你都唔覺… 咁無謂做啦!!)
點解你成日都打機… 唔陪我呀??
(因為打機的時候… 唔洗對住妳!!)
點解我叫親你行東.. 你都要行西呀??
(因為下午西邊曬呀… 唔想你曬親)
點解個電話次次响咁耐先聽呀??
(因為轉咗新接駁鈴聲.. 想俾你試聽呀!!)