好耐冇黎呢度添!!
因為我冇去圖書館借電腦成一個禮拜!! 抱歉抱歉!!

呢一個星期~ 冇電視睇~
睇唔到「爸爸閉翳」既結局篇~ 非常可惜~
亦有段時間冇聽收音機~
淨係執野、清潔、仲有個「食」字!!
去買材料、煮、食、洗~
完全係一個人自己做晒~
做得攰就坐係度發呆~
坐好耐果隻~ 浪費時間~

由今個禮拜開始~ 我會多d借圖書館電腦先~

我需要打一打個日記先~

2/9/07 (日)

呢一日我完全感受到「友誼」既可貴~
朝早十點鐘~ 我既中心小組組員幫我搬屋~
有paul, wing, apple & po po~ 2男2女~
paul & wing好專業~ 識得帶拆床既工具~
apple & po po都好幫得手~ 我有成6個紅白藍~
同兩張檯~ 一小時就搬晒出黎~
最搞笑既係入lift~ 係咁上係咁上~
估唔到一部lift都裝得晒~

我張碌架床太張~ 有6呎半~ 被迫要call尾板車~ ($240)
但原來「雞記」運輸車都有冒牌架~
搞到call果陣竟然有兩位司機話到~
最後揀左快到果位啦~
paul & wing跟車~ 我同apple & po po三個女仔~
就搭巴士+火車入大埔墟~ 果陣落住傍陀大雨!!!!

好彩d雨冇揼爛我d傢俬~
大家都抬上三樓~ (可以租到三樓已經好好)
順利咁搬好晒~ 咁就搞到下午兩點喇~
之後大家落樓下食下午茶~
連sandy miss都到左~

勁開心!! apple特登下午茶時靜靜地去左實惠~
買左個「電飯煲」俾我啊!!
真係十分之感謝佢呢!!
媽咪曾經話過~ 叫我初搬入黎時頭十日八日食飯盒~
而家唔駛啦~ 要食可以買材料煲都得啦^^

之後佢地有野做~ 各自四散~
而sandy miss就買生果請我食~
兼輔導下我既生活情況~

到五、六點~ 邀請左島野香黎我新屋~
佢都係住呢度附近咋~ 呵呵呵~
從此我同佢既距離關係更進一步~ 哈哈~
都係上左一陣間~ 好彩佢唔介意我個新屋混亂~
之後到夜晚大家一齊落街食晚飯~
大埔墟條街四四方方~ 又多野食~ 多謝佢請啊~

同佢食飯果陣~ 我有一刻感受~
果種感受就係~ 有d落寞~
總係覺得一下子變化好大~
咁就離開左家人~ 離開左馬鞍山~
冇任何資金咁冒險走去租套房~
仲要開始一個人既生活~
幾個月前真係冇咁過會變成咁~
島野香同我講~ 搬左入黎就唔好後悔~

勁開心佢送左部mp3收音機~
因為搬入黎果陣乜電器都冇架~ 除左風扇~
起碼聽收音機冇咁悶~ 

3/9/07 (一)

第二日~ 朝早apple帶埋佢媽咪黎~
佢地俾左勁多日常用品我啊!!
apple屋企多左部「雪櫃」送黎啊!!
又係勁開心~ 個雪櫃係成個蛋形咁架~
個牌子係「physical」~ 唔知大家見過未呢??
不過個雪櫃size只能夠擺到8個罐頭到~ 兼唔夠凍架~
不過唔緊要啦~ 起碼食茄汁豆都可以雪一雪~ 頂住先~
佢仲送埋兩大罐「麥片」~ 佢話之前買多左既~
真係好感謝佢呢^^

佢地仲送左好多食具~ 其實我本身都有~
既然多左既~ 咪當係用黎招呼朋友~
之後大家一齊食早餐~ 都係傾下我既情況~
佢地話我可以申請一人公屋~
呢d野我都知~ 遲下實會做~
但我新屋簽左兩年~ 一年生一年死~
最少住一年啦~

之後佢媽咪去第二度~ apple知我需要買膠衣櫃~
同埋要買米~ d野幾重~
於是四圍價格~ 一齊托上三樓~
仲要去兩轉添~ 先托米同綠水~
然後托櫃同摺檯~ 佢話朝早冇野做~
又話一個女子邊托到咁多野~
佢實在太好人喇~ 幫左我好多~
真係唔知點報答apple呢!!

4/9/07 (二)

第三日~ 其實我覺得自己適應能力好強~
冇話好唔慣咁過~
下午我自己落街買材料~
主要都係生命包、麵食、罐頭居多~
我唔會去百佳、惠康買架~ 果度貴D~
反而百佳既菜就好鬼便~
5蚊已經有一大包~ 一個人食幾次都得~
大埔買糧食果然有著數~

夜晚我終於開始自己人生第一次煮菜~
先洗菜芯~ 又開午餐肉~ 仲落埋雞粒~
成功炮製左一煲鳥冬麵啊~ YEAH~~
用電飯煲煲麵真係幾過癮~

5/9/07 (三)

尋晚煲麵食~ 今日又玩新野~
尋日掃貨時特登去裕記買幾盒375維他~
之前問過sandy miss係咪可以煲奶~
佢話得~ 於是我煲~
煲好一包375後~ 加兩殼麥片繼續煲~
咁就成為一碗香甜既麥片喇~
好好味呢~~~~~^^ (其實幾幾幾甜:p)

下午我特別地去左一個地方~
就係那打素醫院既中醫部~
因為之前社署朱姑娘話~
保良局基金果邊要我自己俾錢睇左先~
冇得claim架~ 果邊睇一次至少收$120~
包診金連兩劑藥~

果度得小貓三幾隻~
所以好快入去睇~ 係女中醫~
勁冇架子~ 街坊式談話~
佢話我個濕疹幾嚴重~ 開住兩包沖劑食住先~
建議我日後有筆基金去睇時~
就最好用煲煎藥黎飲 (可惜我仲未有電磁爐呢)
早一碗~ 晚翻渣一碗~
仲有另外一煲煲黎沖身~ 滋潤皮膚~

睇完後出返去~ 冇搭巴士~
直接行到大埔中心果度~
見到超市有包豬肉燒賣5蚊12粒~
好抵~ 於是買返去「烚」~
唔錯唔錯~ 剩返一半試下放落雪櫃~
希望唔會有陣味啦~

6/9/07 (四)

第五日喇~ 早已慣左一人既生活~
又唔算辛苦~ 因為冇返工、冇電視~
連收音機既揚聲器都冇電~
用左好多時間落「食」身上~
以前我只係食~ 其他野媽咪做晒~

如今我自己要諗諗食乜好~
仲要全日唔可以食超過廿幾蚊~
好彩我都冇OVER到~ 因為d野好便~
要食碗烏冬麵+菜+午餐肉5蚊多d就得~

呢晚食埋隔夜豬肉燒賣~
食一、兩粒冇事~ 以為冇問題啦~
點知食第三粒就．．．有d酸~
第四粒仲酸~ oh no~
個雪櫃真係唔能夠擺肉擺得耐~
但罐頭又唔見有事??

7/9/07 (五)

尋日同今日~ Sandy Miss打俾我成3,4次~
佢真係好關心我既生活同中心果份臨時工~
未搬之前佢已經同我講中心有青年大使請~
做兩個月臨時工~ 當時我話做~ 因為果陣好徬徨~
最近佢時不時打緊講面試果陣會做d乜~

直至臨出門口諗住返中心面試果刻~
佢打黎話份工唔係做兩個月~ 係做到出年三月~
當我行到去火車站果刻~
我臨時打俾sandy miss同佢講~ 我唔去喇．．．
解釋完一輪後~ 佢話ok~
之前佢亦都介紹左另一份工~ 位於粉嶺~
但未知詳細情況~ 會幫我再問~

青年大使呢份工~ 得$4,000一個月~
對我黎講~ 租金已經超過一半~
做一兩個月頂住冇問題~ 但做到出年就唔得~
因為我長遠都要搵份高d人工既工~
而且中心表示唔可以做兩個月就唔做~
我唔想咁唔負責任~ 又破壞左同中心既關係~
同埋面試又唔止我一個~ 不如俾剛離校既青年做好過啦~

夜晚終於忍受唔到個地板咁污joe~
於是就開始人生第一次抹地~
唔知係咪我想個地板乾淨d~
倒綠水都倒左五分一~ 以為咁就強勁d啦~
點知加水果陣竟然起勁多泡喎!!
搞到要倒咁d走~ 真失敗~
抹地唔難~ 見到個地板咁乾淨~
舒服晒~ 我間套房地板係鋪地磚架~
顏色光亮又自然~ 唔抹乾淨實在太side喇~

8/9/07 (六)

呢日朝早又執一執下屋~
因為下午有客到啊!!
所以要執得整齊d~

等左六日~ 終於有朋友托左電視機上黎喇~
係舊機14吋~ 就咁插左條cable~
較好晒台架喇~ 但有雪花~
佢地話加埋條天線就會消失喎~ (唔使各位有冇多條唔用既天線呢??)
細細部幾好丫~ 始終地方細~
太大部反而我驚會加深近視啊~
Thx Vincent & 7A~~~~~

之後7A話去深水步幫朋友買電腦組件~
佢有私家車~ 我同Vincent就陪佢~
於是一齊坐佢架車出發~
好耐冇出遠街~ 亦都好耐冇坐私家車~
去到深水步~ 就重現返我之前去買HD既倩境~
7A我第一次識佢~ 原來佢識砌機~
於是買機箱、火牛、底板等~

其實我搬果陣部電腦已經掉左~
但有抽取返兩隻HD出黎~ 就咁帶去新屋~
我突然有個想法~ 如果日後搵到工~
儲到二千幾蚊~ 叫7A買組件唔駛買HD~
咪慳好多lor??
就算去新高登買二手LCD Mon都只需$690之麻~
佢應承幫我~ 哈哈~ 希望遲d可以擁有新電腦~

9/9/07 (日)

呢日好開心~ 島野香又上黎我屋企喇^^
今次島野香親自操刀~
黎一個「地獄廚房」!! 哇哈哈哈!! (佢話既:p)
其實都係我既例牌菜~
都係烏冬麵+菜芯+午餐肉~
但佢切菜切得好好~
仲有午餐肉都切得好鬼厚呀!!
煲出黎簡直食、香、味俱全!! (有相睇架!! 遲d補上)

唔記得左講呀!! 大埔墟有間「阿婆」豆腐花~
佢地整既豆腐花真係特別光滑特別好食~ (完全係好食過滿記多多聲)
我已經食過好幾次~ 今次島野香買兩碗上黎~
作為我地既飯後甜品~ 哈哈~
大家都讚好好味呢~

到下午四、五點~ 送完島野香後~
另一位朋友michelle+佢男友上黎我新屋喇~
佢地仲買左d糧食~ 真有心~
之後我同佢講係直銷中心睇岩左一張長檯~
大家於是一齊出發去果度睇下~
雖然直銷中心d貨品都幾便~
但原來d sales態度認真麻麻~
果張長檯明明話陳列品自取~
佢竟然話新既冇貨之餘~
仲要話陳列品唔買~
令我好失望~ 唯有等下星期睇下有冇貨啦~