雖然香港回歸十周年呢件盛事都過左幾日~
果日雖然冇出街~ 但可以睇到場波同埋煙花~
知道表面上既風光都存在住唔少問題~
要管好一個香港~ 談何容易?

係時候講下自己既拾年．．．．．．

10年前最大件事就係由新界西人變新界東人~
早係1月尾已經發生~ 當時我仲係係天水圍讀緊中二~
每日五、六點起身~ 由馬鞍山搭幾程車到天水圍返學~
仲未有八達通~ 載散銀都一袋二袋~
車錢都好金下!! 最後岩岩回歸到暑假~
就轉校喇~

中一中二果年係讀元朗信義中學~
成績都幾麻麻~ 連升唔升到中四都係一個問題~
但因為搬屋關係~ 教育署安排左一間Band 5俾我讀中三~
果度D學生真係好頑皮~ D功課測驗Level亦容易左好多~
亦當時要發奮~ 一定要升上中四~
所以好俾心機讀書~ 結果全班考第一~ 全級考第七~
順利升到中四~

可惜中四中五~ 學既野又難左好多~
再加上除左英文堂之外~ 讀既理科科目全部係中文~
果陣個英文Miss真係好唔掂~ 佢居然話~
用母語教學丫麻~ 所以講中文黎教書~
而且佢實在太柔弱~ 太好蝦~ D同學成日傾偈~ (當然我唔係啦)
根本上都學唔到野．．．．．． 自己考會考都得呀呀嗚~
千禧年考八科(中英數, 生物, 物理, 化學, 地理, 美術)~
結果得8分 (Band 5既成績算係咁架喇~ 果陣好多同學仔得果5分, 1,2分…)
當然唔係Full Cert啦~ 雖然係有5科合格~
但唔包中英文=.=~ 最搞笑既係最高分係「呃錢」~ 取左個D*V*

當時屋企發生件大事~ 其實搬入黎係住居屋(錦豐苑)~
可惜98年9月~ 係我岩岩讀中四果陣~
爹地無啦啦走佬~ 仲冇供樓~ 俾勁少少家用~
媽咪被迫出去打工~ 但佢賺既~
根本唔夠供按揭~ (單位值$1,185,000~ 每月按揭要萬幾蚊!!)
冇供樓成十幾個月~ 最終要賣出呢個單位~
住左只有三年幾．．．．．．

搬左出去沙田住村屋~ 屋企既經濟已經好谷底~
我唔想repeat~ 因為學費好貴~ 去左讀展翅~
中英文以自修生重考~ 果時完全唔識電腦~
幸好展翅有得學電腦~ 學中文打字~
半年時間已經學好晒~ 當然速度有待磨練~
果陣屋企冇電腦用~ 成日落中心度練．．．

好開心既係~ 第1次參加既展翅~
識左一班學員~ 大家都好投入~
之後仲成立M2001小組~ 幫中心搞大型活動~
到而家~ 7年喇~可以維持到今日~ 非常難得~

讀完展翅~ 就參加一個月既工作實習~
當時第一份工就係一間好大型既機構度做~
就係TVB周刊！！做文員~
全要分信~ 寄送贈品~ 輸入會員資料~
當時請多個幫手~ 佢就係島野香!!
見唔見到藝人?? 其實都幾難見~
要去canteen先見到~

01年尾~ 爹地媽咪正式離婚~ 當時媽咪好傷心~

02年9月先開始做一份長工~
當時參加左I.T.種子計劃~ (一星期有一日返培正讀電腦課程)
係一間小學度做教師助理~ (其實我當時都係做校務處文員)
主要打通告~ 文書工作~ 亦都會幫小學生搽藥油~
試過帶D小學生參加活動~ 果度D人際關係~
係複雜架~ 因為老師既心聲~
學生既心聲~ 非教師既心聲~
校長既心聲~ 家長既心聲~ 我完全聽過晒~

補充返~ 02年5月~又搬返入馬鞍山住~
但唔係私家樓~ 可以住返公屋~

之後呢幾年~ 都係出外工作~
其實自從父母離婚~ 爹地都冇俾家用~
變左係我俾~ D零用錢~ 試過一星期得$50~
係真架~ 直至05年中細佬搵到份長工~
先多返D~ 電腦都係03年先有錢買~

最近我先知道左個真相~
係關於爹地當年唔供樓果件事~
我係度諗~ 佢自己都係搵得果萬四五蚊一個月~
按揭都要成萬幾蚊~ 得返幾千蚊點維持到呀?????
原來佢諗住我升唔到中四~
讀到中三後就出外打工~ 仲諗住媽咪又出外打工~
三個人一齊供樓．．．．．． 係媽咪講既~

真係估唔到佢竟然咁諗．．．
中三點出黎撈呀？？
點都要做一個文明既人lor!!!

呢十年對我黎講~ 我會覺得~
呢4年係過得特別快~ 可能只係打工~
平凡咁生活~ 對媽咪黎講~
係過得好唔開心~

未來呢十年~ 係時候要作出改變．．．．．．