下午我落左街，特登去買牛仔褲。以往我只會著橡筋褲，因為我肥左，著唔到之前果D。因為千色店果份指定要著Polo Shirt、牛仔褲同波鞋，我統統都冇。要買番晒，錢銀上真係好吃力．．．．．．

今日買唔到波鞋，要明天再出去睇．．．但Polo Shirt，千色店果邊D人話要著白色冇花長袖既，仲話「左丹奴」有，我去睇左，唔見有既？？行埋其他名店，統統都係圓領、V領、樽領．．．正常丫～邊D衫舖會Sell Polo Shirt咁老套丫？？仲要係白色！上網睇下又話旺角、尖沙咀有，肯定百幾蚊件啦～邊有咁多錢買？？好煩．．．

為左呢份工，買咁多野，駛咁多錢．．．屋企太清貧喇！媽咪表明唔會比錢我（仲唔會支持我添，我屋企係咁），我身上得$100，真係唔夠駛，睇黎又要向第三位朋友借錢喇．．．

今日早左起身，哈哈～好少咁樣．．．自從加入左mocasting，睇多左其他人既Blog，當中小堡主既Blog用最多時間，因為我實在被果D食物相吸引住啊！！吸引程度極高，仲要係餓住咁睇，口水都要吞幾次（無計啦～要流出黎丫麻～～^^）

我雖然係為食，不過，我其實要戒口架！因為我有濕疹，所有紅肉（如牛肉）、海鮮、辛辣、燒烤、煎炸、芒果、荔枝、咖啡、一般零食（可能仲有好多）等等，通通唔食得！我只能食一D簡單、便宜既食物。所以每逢我出街食野，都要格外小心，食得肉多都會癢架！！

其實我最近呢個月D皮膚已經好好多，無乜紅，但好乾燥。可能冇返工，休息多左就會咁。

講開返工，下個月如果日日返，日日勞動，皮膚會唔會出事？希望冇啦！

25/1/2007 (四)

下午收到千色店既電話，我下個月2號有得返工喇！Yeah～呢個就係我之前賣關子既新挑戰喇．．．

做左4年幾既Office Work，一直都係坐坐坐。今個月坐得仲勁，send左咁多封求職信都冇人回，唯獨千色店先肯理我．．．「過年前」做Sales企企企，唔知會點呢？由2號「直踩」到17號，冇假放，返下午到夜晚，隨時OT得更夜，都唔緊要～幾夜都唔怕．．．至於企係邊個部門，Sale D乜，未知～到時先安排．．．如果幫手包禮物，就好lor，呵呵．．．

24/1/2007 (三)

冬眠．．．

23/1/2007 (二)

夜晚上跳舞班，最後一堂喇～竟然得10個人上堂！未試過咁少！但因為咁我搵到個好位去warm up．．．之後做壓腿，Miss今次冇幫我舉高隻腳喎，可惜．．．之後跳現代舞，我驚佢會教唔晒，好彩最後教得晒，成首「我Buy」歌既舞步終於識晒。上完堂，同Miss講拜拜，我去到Counter取聽講證書（要十蚊一張，好唔抵～）。其實，3月初有現代舞中班，都係果位Miss教，費用係$430，可惜我冇能力交．．．

凌晨時份。

唔知點解我係度係咁搵，係咁搵一D野。幾經辛苦下，終於俾我搵到佢出黎！太好喇！我不斷睇，不斷睇，我實在好驚訝，佢寫既文筆、風格，實在好好好似另一位，寫得個感受勁深之餘仲要係多產果隻（每篇唔係每日），我實在佩服萬分（要講再多次驚訝）。我從來都未見過一位咁勁既人．．．睇睇下，我竟然睇晒，睇到尾．．．最後發現，原來我要搵既野，係「遠在天邊，近在眼前」。頂～

22/1/2007 (一)

我由2/1到而家，待左21日，終於下午可以去interview，而呢份工，無論職位、時間、工作既地方、做既職責係我係「從未」做過既。唔駛要你交証明副本，唔駛要求你有咩條件經驗，肯做豬仔就得喇。相信講到呢度，大家都知係做乜啦。如果唔知都唔緊要，還掂又未正式請我，都係等電話，而且．．．有少少因素我要好好咁考慮下。遲D先話俾大家知～

夜晚返廣源中心開組，講下個4/2(日)去老人院做義工服務既程序。出席既有我、Sandy Miss, Paul, Wing, Sarah, 茵同Po Po。我地睇左D相，係D閘要油油既地方，真係好生銹．．．老人院果邊話我地最好同老人家玩下遊戲同傾下偈先至油油。咁我地諗到D遊戲，第一係傳波波（至於音樂中心會提供）；第二係老師話（Sarah會帶領～）；第三係唱歌（由我地既全男班Paul, Wing同阿龍～哈哈哈）。Sandy帶左D歌詞集，係D舊歌歌詞，我地見到有D好搞笑（唔記得係咩歌喇～），Paul同Wing仲要係細聲講，大聲笑，總之大家笑到肚痛．．．我地係咁架喇，勁鐘意講gag～

 

玩完呢幾樣遊戲，我地打算派禮物，打算送毛巾、餅乾同麥片。生果原本都想（例如香蕉、柑），但怕老人家有糖尿病所以揭置。到最後我地先油油。油到五點半就完，夜晚大家食飯．．．

 

係喎，唔記得講我果日會負責乜添！我負責做MC～哈哈～我而家有既時間，所以度MC稿唔係問題。不過．．．呢日其實我都唔知去唔去到．．．到底錢緊要，定係做義工緊要？個個都知我情況，有俾意見．．．唔該晒～

前兩、三日都send e-mail去應徵，但等到而家竟然一個feedback都冇．．．點解會咁架？唔通真係要過年後先搵到工？真係唔想lor．．．我諗如果要好快搵到工，千色店係唯一可以幫到我（唔係，係幫到我屋企），我決定下星期一親自去果度登記，就算冇得駛錢，起碼可以做一D我未做過既野啦～但如果唔請，都冇法．．．

今個月真係幾乏味．．．好想食麥記新出既咖喱豬扒包，同埋著皇，不過想下好喇．．．我其實都可以食麥記D奶昔、奶茶、甚至朱古力新地（佢果D唔係真朱古力）。麥記離我屋企真係好近，落樓下行多兩步就係．．．

呢日，幾想出街，但都唔會．．．

下星期22, 23, 25號，夜晚會出去。有兩日返中心開組，一日上跳舞班，淨係交通費都用唔少．．．我已經問左第二位朋友借錢喇～真係唔想越「滾」越大．．．

19/1/2007 (五)

繼續上網搵工、send信、其中一份係千色店，係好特別，如果有得in，有得做，都做住先。唔想屋企冇錢過年，唔想係屋企只係食豆府、食粥，份量少少果隻．．．

好耐冇打日記添！！真係唔好意思．．．

唔係因為唔開心唔打，唔開心既事，第二日已經平伏左好多。只不過呢幾日都係咁過，冇乜好特別既野發生，又或者我賴打啦，哈哈．．．月中了，總之今日起我要努力搵工！！

14/1/2007 (日)

呢日真開心，同朋友一齊製作英文application letter。我既英文其實好「jar」，同小學生程度冇乜分別:P。佢幫我翻譯，譯完之後都有好多野問，有野要改，仲學左D名詞。真係好感謝佢呢^^日後搵工send信都Pro D啦^^當我搵到工實請佢食餐勁既^^如果有更好既報答佢都接受既，就最好啦~~~

好期待呢一日，呢一日我一定會去同佢影相~~

13/1/2007 (六)

我本身既興趣係好鐘意聽新歌，所以呢晚一定睇十大勁歌金曲。但睇完既感覺，唔知點解總係有D空洞。

最令我睇得唔舒服既係，好少歌星出席，冇獎取既歌星索性唔去，點解要咁做？？我亦睇到班歌星，好似為左出席取獎而出席，樂壇既凝聚力去晒邊？？Joey第四次取最受歡迎女歌星，竟然冇乜感覺！！本身我好鐘意佢丫麻！！反而衛蘭最四台聯頒金獎，覺得好高興；Eason取最受歡迎男歌星，都開心既，不過我其實自己係鐘意基仔多D．．．其餘軒仔取到國語金獎，都高興．．．造馬果D唔特別講，反而我會dun千嬅、Ivana同Kelly唔底，食白果，Kelly取得亞太又有何用？

12/1/2007 (五)

我逢星期二晚去上現代舞，通常頭一個鐘做warm up同壓腿，之後半個鐘就跳現代舞，播郭富城果快歌黎跳，

總係覺得果首歌好舊，好多年前咁。前日未上堂果陣我走左問Miss(佢都有五十歲)，果首歌叫咩名，幾多年前作品。原來叫「我Buy」，05年作品．．．我驚訝，原來咁新，恕我對郭富城膚淺．．．Youtube有片架！！有人用呢首歌黎跳架！佢地既節奏好勁．．．

而家先搵到果首歌，一路聽一路練跳，又遲左D既．．．因為我仲有兩堂就完喇．．．前幾堂我地可以優先報名上中班，但我唔諗住報，因為我跳得唔係咁好，而且我雙失，完全冇錢，雖然$410 / 12堂，係幾便，但我都冇能力俾，屋企更加覺得side錢添！！冇得繼續跳，有D可惜．．

11/1/2007 (四)

呢晚好特別，出旺角約Technic同事食韓燒。未約之前，我黎早左，當然會入去新之城機鋪打機啦！無錯，我以前放工後，都好鐘意落機鋪打機，sorry，應該話打鼓。自從冇返工，都冇再打。果度例牌一定逼人，但我唔怕，仲好好彩有位俾我打鼓，好彩都冇生疏到，哈哈！！

八點半就同佢地在朗豪坊會合。冇見佢地三個月，都冇乜點變，有阿聰、Dicky、Jerry、Chris、Janice、Jessica、Sun同鬼婆Winnie，仲有Carine，佢由大馬返黎香港，順便見下我地，太好喇！！佢仍然咁靚，咁可愛，仲後生左，哈哈！！未入去食之前，我同鬼婆Winnie溝通喎！！哈哈！！好彩我講到一兩句～

其實我皮膚敏感，係唔可以食BBQ過既肉架～所以我只好食熟食，例如腸、雞翼、菜同壽司，甜品係雪糕，牌子雖然係維記，但都照食「兩碗」，哈哈！！其餘都唔敢食喇～同佢地傾偈，好多好笑野講，講完中文之後，Carine都會譯返英文比鬼婆Winnie聽，佢又笑埋一份，但我就．．．唔識聽，哈哈！！我自從離開Technic三個月，公司搬去新Office，亦都有D同事冇做，包括Cici，佢原本係我上司黎架，估唔到佢咁快走lor．．．每人$120，超超超超超超貴！！對我黎講。好彩有朋友借左錢我先俾得起咋！！

我地食到十一點幾就走喇，唔知幾時會再見返Carine呢？大家四散，我自己一人搭火車走。好鐘意行旺角條大街，側邊就算多人行都唔怕，果度搞下Fashion Show都唔錯．．．

今日搵工，似乎有1,2份可以apply．．．

7/1/2007(日)

呢個禮拜，真係過得幾悶，日日上網搵工，出奇地冇乜合適既工可以apply喎！都唔緊要既，當放長假lor．．． 

6/1/2007(六)

等左年半，方力申就黎出碟喇～真係等到勁都長埋！！我要快D聽到佢D新歌！！唔知點解佢唱歌既聲線，總係令我諗起一個人．．．^^

最近知道Janice開演唱會，就Check下個詳情，原來下星期一起有恆生信用卡就可以優先訂票，我於是問下D Friend有冇，結果一個都冇．．．唯有等公開發售啦～我諗山頂位唔會咁快買晒卦？哈哈．．．

5/1/2007(五)

我手機出事，USB Connet唔到，搞到裏面既相、歌同錄音都過唔到落電腦．．．已經發生左幾星期喇．．．整極都整唔到．．．唔通又要特登去買晒條線？最可惜係鈴聲唔能夠去到最update．．．

我手機其實都Out，一係冇藍芽，二係MB少，但而家又身無分文，邊可以咁大想頭買返個新？