好耐冇打日記添～其實今個星期，除左工作、追睇TVB劇集，都冇乜其他野做．．．今日有D例外啦～

(閱讀全文)

今晚睇星期日檔案，講九型人格，有分以下九種：

第一型: 改革型 - 理性正直, 力求完美
第二型: 付出型 - 和藹慷慨, 富同情心
第三型: 成就型 - 精明能幹, 重視形象
第四型: 自我型 - 與別不同, 自成一格
第五型: 思考型 - 好學不倦, 機智過人
第六型: 忠誠型 - 忠誠可靠, 警覺性高
第七型: 活躍型 - 活潑好玩, 興趣廣泛
第八型: 挑戰型 - 權威自信, 敢作敢為
第九型: 平和型 - 隨和豁達, 樂天知命

內容講兩夫婦，妻子係八型，丈夫係九型，好明顯係一凸一凹。第二pair夫婦，妻子係三型，丈夫唔記得左添！總之係內向同感性既性格。我覺得呢兩對夫婦，都係妻子大晒，強中之強；丈夫既就成個小男人，再唔係就內內向向，唔通咁樣先係長久？？

之後都講晒九種大概係咩性格，而且仲話美國、香港大學都有呢D咁既心理學課程讀下。我覺得好有趣，自己都好想讀下！甚至去上呢D堂測試下都好丫～不過，一睇到D夫婦，我就好想知道，究竟佢地係咩星座呢？我始終都覺得，星座既性格講得仲準呀！！

其實我早在上年5月已經測試過，結果我係第五型 - 思考型。可惜條測試link已經死左，如果唔係我實俾大家分享！！

明天返工喇～開始呢個早起身既日子，希望適應到啦！休閒一個禮拜，算係咁．．．

24/2/2007(六)

未起身果陣同朋友傾電話，一傾竟然傾成個鐘，Good！！

之後收到個電話，叫我下星期一interview，果份工係位於尖沙咀既顧問公司，職位係行政文員，佢要求唔高，不過我果日都返工～所以都係唔去喇～都幾好丫～我send7份，有4份中。過年前又唔見中？真奇怪，搞到被迫做千色店渡日。但話時話，相信千色店出糧都要等月尾．．．

最近聽新碟，主要都係Stephy同泳兒。聽Stephy隻碟，覺得「你好嗎？」同「不速之約」最好聽。但係之後聽泳兒，發覺更耐聽！佢音域好廣，尤其係「傾科樂園」，好鬼正！一時憶蓮，一時王菲！仲有「黛玉笑了」，仲王菲！！同埋「我是你的樂與怒」，又係用另一把聲演釋，感覺好厲誌～

聽完泳兒，都覺得Stephy都係普通地唱歌，並無好突出之處。至於樣貌，好多男仔鐘意，覺得佢好甜，好可惜我對佢冇乜感覺啊！！

23/2/2007(五) 

我搵到份新工喇！！Yeah！！

朝早11:30am，去大圍既一間做瀝青既工程公司見工，職位係總務文員，個考官叫顧小姐，佢打扮好lady～之後都係例牌問我之前做乜，我就重點講以前Global公司做既野，真係乜都做，基本上成個生意既流程文書上我都掂過下，兼且外勤工作．．．之後問我職位上會著重選方面發展，我話Sales先，之後CS、Admin野都冇問題（經過朱女士提醒），但自己講多一句，做Sales一定要好清楚產品上既野，先好做．．．之後佢講好多野，例如公司業務、做既工作、返工既時間等，更加講呢度既同事性質、上一手既工作情況、總之佢強調一定要有良好工作態度，好似講左好多感受咁～而我都一一明白佢講既野～成個面試過程都好順利，冇令佢對我有D質疑^^最後佢話下星期一有結果，如果請會call我～

走果一刻，感覺良好。覺得自己表現都唔錯～要做既工作，同Global做果D分別唔大，雜工一個，相信自己係做到既！請我機會唔細～之後我由大圍行去新城市，去百佳買$15兩送飯，唔好睇少，有菜有雞肉，份量十足，食到我勁飽！！好滿足！之後搭火車上粉嶺，去專科診所覆診（我有皮膚敏感，定隔2個月到），情況都係乾燥，紅都有少少。之後取藥果一刻，顧小姐竟然打黎！！話請我！叫我下星期一返工！嘩！估唔到隔幾個鐘後請我！即日面試成功！爽！

我帶住開心既心情返屋企，咩科學園、九龍灣可以擱置！呢份工無論地點、時間、人工、工作性質，全部都好理想！！但呢份工要良好英語，我唔識英文，當時唔諗住send信過去，但諗唔到後來照send、到可以面試、甚至正式請我，都係意想不到！諗唔到搵工既時間咁快完成！坐埋今個星期六、日，又係工作既時候喇！我要努力！

呢一、兩日唔止我，仲有我D朋友都有開心野發生^^

今日既兩份interview，尤其是朝早果份，短短個零鐘，實在見到同學到好多野！

科學園呢個地方，集合Hi Tech建築同植物於一身～我當時好想影低呢個地方～可惜我手機既USB線壞左，所以我開Blog咁耐以黎一幅相都冇post相，認真遺憾．．．

之後到生物資訊中心，果度石Q好有禮貌，要上lift要do聰明咭，否則唔俾你上，保安認真嚴密。上到一樓，竟然見到Pantry，係公用既Pantry，有微波爐同檯！咁正！之後入到公司，到開始interview，考官朱女士，佢實在太唔簡單。唔駛填form，唔駛交cert，一開始問我呢間公司做乜，有冇睇網頁，我答冇．．．之後問以前公司做過乜，到氣玉，佢問我做左幾年support既工作，你會點樣鋪排你既事業（其實佢用唔同既語句問左我三次），我答得唔好，只係一心做support，但佢話助理唔會做一世，係有得升上做Consultant．．．（呢層我真係唔知，只係覺得做得生物公司Sales，一定係大學生）最後我都講出我都想上位，例如Sales（但呢D說話～有時唔想亂咁講～我要好睇公司做D乜～自己有冇把握Sales得好～同埋要知道做Sales係咪要大學生～因為我只得中五程度～），但又俾朱女士話，話我可以唔靜止講做Sales，佢知我做過Telemarketing、Marketing、同埋Admin，可以講多D呢方面．．．（佢公司會愈做愈大，一路增聘人手，又講左短期內未必留係科學園），之後考我普通話（D客有時有內地孕婦），佢都話我可以講得好D．．．

最後佢話今日會見多幾個，有冇得second in都未知。走果一刻，唔知點解冇諗會否請我，但會諗朱女士同我interview既情景。我從來未見過思路咁闊既考官．．．我淨係知道，下次點樣去Present得自己好D！

之後離開科學園，返左屋企。到下午我又出去，去左九龍灣，經過德福廣場，總係覺得行親呢個地方感覺都高尚D！去左一間清潔公司in人事部文員，填form用左半個鐘（因為有兩頁寫telephone manner、如何解決urgent問題同做左D乜，仲有更把炮既「作信」！以書信方式回應客既投訴！十足上中文作文咁！寫完之後測我電腦，話就話有幾個test，其實係五分鐘內完成，之後個考官好普通咁講，做計糧、統計員工幾多人上班，處理大假、事假野、工傷等．．．我相信做得黎，最後等消息．．．呢份請唔請都冇所謂，橫掂人工偏低～

in完之後，又收到電話叫我明天interview！過完年冇耐黎個密集式既interview，幾好丫～原來apply D條件高既工，有得去interview，就算唔請，但如果遇到有深度既考官，都會學到一D道理。今朝果份，簡直難忘！謝謝朱女士．．．

初一至初三，放假留在家中休息，總係過得好快。

 

千色店果邊，未知幾時有糧出，不過我期望越快越好．．．仲有，之前提過我唔小心俾客拎走個煎Pan，未知佢有冇俾錢，可能要賠。但之後成個禮拜工作，阿君提都冇提，連我最後一日走都冇講．．．如果唔駛，都好既～但個教訓我實銘記於心．．．

 

而家係時候繼續搵工，我前日有上網搵工，記左幾份過年前既post．．．原本唔打算send信，因為某D要求我係冇既。今日初四，新post果D好少，都係睇中幾份。後來覺得，即使條件唔得都照send啦～合共send左7份，結果2個鐘後，就有2份打俾我明天interview！

 

一份九龍灣，低級；一份科學園，高級！低級既係地方遠，人工少，做既野較易掌握；高級既係人工高，返5日，但英文要良好，我係唔得既．．．但能夠去科學園，對我黎講係一個驚喜！因為果度建築真係好Hi Tech！兩份工都幾極端，冇中間位．．．不過唔緊要，係一個開始黎～期望多D中間位．．．

 

20/2/2007(二)

 

年初三，係赤口，前幾年屋企人有去車公廟拜神，但今年冇．．．媽咪真係乜都唔搞，連年糕都話唔煎，唔知幾時有得食。但難得既係，三個人可以團聚幾日．．．唯一食得好既都係呢個晚飯．．．

 

好鐘意聽Twins同草蜢果首「紅噹噹飛吻」！Twins唱歌今次算有進步啦～

 

19/2/2007(一)

 

年初二，夜晚放煙花，但冇得睇。媽咪話好憎香港放煙花，覺得浪費金錢。以前唔鐘意71、國慶放，又話過年放OK，而家連過年都唔like～都唔緊要既，過年既野，辦年貨、拜年、利是、煙花、年糕年年都係一樣，就算冇做，都冇咩唔妥．．．

 

記得上年過年，年初二果晚我同Michelle竟然約埋一齊出去睇煙花！聽到D砰砰聲真係好震憾！好好睇！當時我覺得，睇煙花好過係文化中心度倒數．．．

新既豬年，祝大家身體健康，心想事成，事業進步，學業進步！！

今日年初一，留在家中。相信大部份人都會拎住賀禮，去親戚屋企度拜年，食下團年飯，逗下利是．．．以前係有，不過，近呢五、六年都無做，所謂「家家有本難唸的經」，係咩原因實在好難解釋，總之唔能夠見面，亦都唔知幾時可以再見．．．屋企既問題，實在太複雜．．．

有半個月工作，時間又長，冇離開自己既地方，唔知外面既世界發生咩事。而家，我覺得自己好似由一個好遠既地方返左黎咁，可以做自己鐘意做既野，睇返晒你地既Blog，好多人講情人節，亦都估唔到咁多人評論曾特首果句口號。希望我可以勤力D睇返晒二月既新聞啦～

收到一封媽咪既利是，食飯有得食魚^^「年年有餘」呀～大家睇電視，花車巡遊都有講有笑。咁樣，都好滿足喇～～

17/2/2007(六)

年三十，最後一日返千色店～好怕D美亞、銀星既Promoter行開，一行開就有客睇中左個煎Pan，想要個新，我入Counter搵，點知竟然搵唔到，又叫個客轉頭先黎．．．仲有，阿君同我講，自己既範圍無論有冇客，都行晒一周，點知另一同事阿儀話叫我唔好行咁遠，行近個Cashier（因為阿儀大部份時間幫Cashier入袋），佢咁講都想我企係度Standby，等佢assign姐～突然間有一刻好想快D過埋今日．．．

今日兩次食飯係四點、同埋六點。四點我去麵包鋪揀幾個，俾錢先知可以免費取多兩個，幾好喎！留返兩、三個放工先食～食完返返去工作，只係一個鐘，當中同事阿珍做到流晒汗，可能大多客有需要同要求喇～到六點我又去食飯，遇到同事阿詩（佢同我一樣做臨時工），同佢傾偈，原來佢又係上廣州讀書既人，不過就比阿翹讀多幾年。唔通呢D係中五畢畢業生新興既升學途徑？

七點食完，要工作「6.5小時」先收得工呢！！其實整體上唔係好多客行，廚具更加少，自己來來回回咁行無數次，就要企到腳累，都照出力行，偶然都有客睇中調味架我去取新。之後都係執一執D貨．．．十二點前係好悶，好累．．．

估唔到，千色店廣播會倒數豬年！一踏正十二點，就播「財神到」，同同事、唔識既客講恭喜發財！真係好特別！絕對係人生第一次咁過年初一！之後冇耐我地又有得食西餅！今次有機會食到東海堂，太好喇！等左咁耐，終於到點半，大家要推返D bra車返去，再交返圍裙、証同工咭先走得．．．今日都係同阿霞、小雲同阿翹一齊行返屋企^^再見喇～咁多位同事～

16/2/2007(五)

年廿九，今日好好好多人，直頭有段時間係迫呀！可能明天放假呀～我廚具果邊都多左人買煲，仲要係同一隻牌子Size被人買兩隻，唔係Buffalo，係韓國牌子，但Buffalo都有翻貨．．．唔翻我真係同佢死過呀！做到三點，就食飯，係好早，但無計啦，阿君安排既，呢幾日有得食兩餐，算係咁啦～我都係食包，到第二次食六點我就正式食飯，原來今日所有員工有得食西餅！！太好喇！！我揀大大個既朱古力蛋糕^^，要食飽D，黎應付之後「6小時」既工作．．．

夜晚仍然好多人，我果邊多人揀筷子，又要隨時support阿儀，都係手板眼見功夫野，其餘時間都係來來回回咁行．．．到十一點後，人流開始冇，仲要企多兩個鐘！根本上係度hea．．．但無耐就遇到D客對美亞既鑊有興趣，可惜個Promoter已經收左工，又問D好深既問題，我應付唔到，只好搵阿玉解答．．．

之後十二點，就真係搵同事傾偈咁滯！我同阿翹傾（佢同我一樣都係臨時工），原來佢本身上廣州讀書，有寒假放先返黎香港，做下臨時工，佢都係中五畢業，想繼續升學，就揀上廣州．．．老實講，我從來未聽過呢樣野，唔知係咪呢幾年先興，我當年中五畢業，大多數人都係揀展翅、毅進或者IVE．．．佢以為我岩岩中五畢業，哈哈！我都好想返轉頭．．．

15/2/2007(四)

年廿八，屋企之前已經執過黎，唔一定今日先做既．．．下午返工，放午夜十二點，頂癮啦～呢排我手指頭甩皮，可能成日執貨，接觸紙皮，阿君話唔駛洗手，因為會做好多次，但有污joe野我又頂唔住喎，於是成日洗手，搞到咁lor．．．原來做Sales係幾傷手．．．

做到三點幾，阿君突然叫我食飯，原來今日起可以食兩餐！！每餐都係食一個鐘！媽咪俾我D飯唔多，我特登去百佳，睇下有冇便包食，結果$2.5可以食到一條芝士條，正！但去到排隊果陣就超多人！！太多人辦年貨，係多過千色店既=.=，等勁耐先俾到錢．．．

之後第二次食七點，都幾好丫～越遲食越好呀～食完都係工作4小時就收工，夜晚好多客．．．

14/2/2007(三)

朝早都係訓覺，下午返工，食飯果陣我特登食下朱古力曲奇，當係慶祝情人節，之後竟然行$10佔，其實都係屬於千色店，見到D碗碗碟碟，唔知點解有點兒驚訝，覺得D料好jar，可能我實在對得樓上工作既地方既靚貨對得太耐喇！完全明白「一分錢一分貨」既道理。

夜晚，好少一pair pair黎呢度，正常既～係都去餐廳或者外面啦，所以咪好悶lor．．．

願天下有情人：情人節快樂^^ 13/2/2007(二) 下午返工，起初好平靜，可能平日啦～但之後越黎越多人，堆埋一邊，果度就係「蛋糕模工具」喇～上星期先翻貨冇耐，例如朱古力心形膠模、心形錫紙、糖果袋、蛋糕紙盒等，但今日已經俾人買左好多好多，D膠模幾乎買清（每一塊成$33，有幾種款式都買到九九十十），遲黎既客被迫買錫紙模，連紙盒都冇乜剩．．．正常既～情人節丫麻！D客大多數反而係學生、年青人、年輕情侶或夫婦，老一輩果D係冇既～整下蛋糕、朱古力，不知幾正！ 唔止蛋糕模，仲有其他貨，例如水煲，Buffalo同Kinox呢兩隻牌子，呢排成日都有客要，每日起碼入倉取幾隻新，結果到今日已經冇晒貨，試過有客連陳列品都要埋；仲有D膠筷子，前兩日已經俾客買到冇乜剩，成日都有客問我D玉色去晒邊、紅色去晒邊、每個客都有唔同要求個喎～ 今日終於有得翻貨，但D貨翻得唔係咁好。首先「京都」牌玉色筷子係最多人揀，偏偏翻成一百包「中華」牌玉色筷子；仲有D漆油顏色筷子，係好靚，但明明冇乜人買偏偏又上多幾十包，做埋D蝕錢生意．．．我相信過多個幾月實仲係到姐～哈哈～