12/2/2007(一)

今日放假，俾自己休息下。冇乜點諗尋日件事。

自從做呢份工，或者下午先返工，朝早可以做其他野啦～但其實唔係，我朝早係訓覺既，起身無耐就食lunch返工．．．放工返黎十一、二點，開下一陣電腦又唔知做乜，就訓覺．．．好多野我都冇做，例如睇新聞、劇集、綜藝節目、行街、約下friend食飯等等，真係好似買身咁．．．

返多五日，我就可以甩難，哈哈哈哈！（講笑）

阿君同我講，其實呢份工係有得續約做full time既，但我相信，我會做既機會得20%．．．唔係話做得辛苦，「企」我已經企慣，放工都冇話要坐。做既野、運作、程序我都開始熟絡。問題係「時間」太長喇～做唔到自己既興趣，外面既世界發生咩事我又唔知，咁既人生實在太「悶」喇！！

下午我落一陣街，我買左一樣野，好滿意．．．冇理由乜都唔做姐～

11/2/2007(日)

呢一日，發生左三件事，真係好難忘．．．

今日返工無耐就要將BBQ餐具（包括燒烤架、日營背包、大保溫壼等．．．）既位置（有幾張長檯同地台）Counter移去另一邊個loan loan，絕對需要體力勞動啦！好彩阿儀都有幫手。點解要移位？因為果度係露台，出面係望到商場地下，果度有Function搞呀！有Twins同草蜢呀！！！移走D野後方便D人走埋去睇丫麻～我咪冇得睇lor！超無奈．．．只能夠聽佢地把聲，睇唔到佢地個樣！絕對係「這麼近，那麼遠」呀！！

到五點Function完左，人群散去，自然要「還原」返啦～阿玉原本打算同我一齊搬，但搬搬下發覺唔係好記得D位點擺，變左佢話唔搞住．．．但我唔想就咁算數，堅持自己一定要做，所以我「獨力」搬番晒，兼盡量排位，係辛苦左D．．．後來阿君知道左還原唔到原本既樣貌，就索性叫我發揮創意，重新排靚佢，兼叫我將每一樣野用索帶連住，一黎防止跌落街，二黎防止比人偷．．．終於做好喇～自己都好滿意．．．

但做到野無耐，就發生左一件大事！有個Counter仔係賣煲既，Counter阿姐交帶落，有個客會過黎收煲蓋，兼連埋個煎Pan，阿君都知呢件事。之後我連續有4樣野要Serve個客，其中一個就係黎取煲蓋，我比埋個煎Pan佢，佢俾左張Barcode紙我，之後走左。跟住我話番俾阿君，佢問我個煎Pan個客有冇俾錢，我答唔到，頓時啞晒，果刻死喇！奶野添！原來個煎Pan要俾錢，連原本對我幾惡既蘭子都即刻去收銀處睇單，check個客有冇俾錢，翻睇好多次，結果．．．係冇既．．．個煎Pan值$153，我好有可能要賠錢．．．

點解我會做錯一件咁大既事呀？？？果刻好好好down．．．我唔係down錢，而係down我未聽清楚就擅自攬上身，我做得真係好錯、好錯。我果刻好擔心會被炒．．．我向阿君道歉，佢話唔使，只要自己肯成擔責任，兼買個教訓，已經好夠。似乎唔係好嬲我．．．佢話會再check個收銀有冇記錄，後日就知我使唔使賠．．．賠唔賠都實俾邱生省我一鑊金啦！！

呢個教訓，真係幾大．．．做售貨員，確實唔容易．．．．．．

10/2/2007(六)

又到左最忙碌既時間喇～今日未返工之前特別約左島野香，有野比佢～之後佢去三聯買書，我話俾知我既工作地方係邊，其實好近，佢話會過黎～太好喇^^

到我正式開工果陣，巡巡下自己既範圍，島野香突然出現喎！去睇筷子！我當堂嚇親！哈哈！我都知佢實有興趣睇呢D野喇！因為果度D筷子好多來自日本款式，我當然同佢傾下啦～結果佢都睇中左紅花果款，真係有眼光，好多客買架，翻左貨唔係好耐，又剩番咁少喇～哈哈～

之後光頭主管（我終於知佢叫咩名，叫Vincent Yau，咁我叫佢邱生啦）搵我，問我應唔應付到。其實我都知自己一唔清楚就搵同事幫手，變左佢覺得我好似做唔到野咁．．．佢之後話，呢段時期好多客辦年貨，同事係最忙，冇咁多時間教我（但起初佢又話一唔明可以問人喎．．．），又話請返黎要幫得手．．．我話而家入倉取新貨已經漸漸屬手，請佢俾多次機會。佢信我．．．

Dinner食五點，六點食完就要工作「五小時」先收得工．．．

9/2/2007(五) 

Oh no!個msn我收到個網址，話有幅圖係我，叫我Click入去，結果執行左．．．

死啦．．．我好驚部電腦有事．．．

8/2/2007(四)

第六日返工，今日絕少行行企企，開工無耐就幫手上貨，係D膠盒，靚貨果隻，其實上貨並唔係話就咁上就算，而係要識得擺位，覺得好滿既就要諗辦法點排好D位．．．之後幫手排杯，D杯勁貴，成$100一隻，又要去倉執D套裝出黎，係咖啡杯，又要擺靚個位．．．

4pm食飯，我通常用半小時Canteen食，之後半小時會出去，行一陣商場。今日唔係，我去people轉台，三月初先用得，好彩辦手續幾個字搞掂．．．之後開返工，上整蛋糕架既貨，之後行行企企一陣，再處理幾箱貨，要睇住送貨單D Code黎黐Label，D貨係浴室用品，完完全全係離開廚具範圍黎做野，黐完Label又要包好件貨，又要上架，花左起碼二個幾鐘．．．

特別既係，一向都有點兒怕既上司蘭子，今日對我溫和左D，佢教我黐Label點樣可以更快。

7/2/2007(三)

第五日返工，特別既係有個地方係賣家庭電器，一向有位同事Angel睇住，今日當佢去食飯，阿明就叫我去果度睇住，果度D野我更加唔屬啦！所以一有客問到例如電飯煲、熱水機有咩功能、用途實答唔到．．．隔離有收銀處，可以幫到手，例如有玻璃既幫手包，同埋幫手入袋．．．

除此之外，都冇乜特別．．．

下午我落左街，特登去買牛仔褲。以往我只會著橡筋褲，因為我肥左，著唔到之前果D。因為千色店果份指定要著Polo Shirt、牛仔褲同波鞋，我統統都冇。要買番晒，錢銀上真係好吃力．．．．．．

今日買唔到波鞋，要明天再出去睇．．．但Polo Shirt，千色店果邊D人話要著白色冇花長袖既，仲話「左丹奴」有，我去睇左，唔見有既？？行埋其他名店，統統都係圓領、V領、樽領．．．正常丫～邊D衫舖會Sell Polo Shirt咁老套丫？？仲要係白色！上網睇下又話旺角、尖沙咀有，肯定百幾蚊件啦～邊有咁多錢買？？好煩．．．

為左呢份工，買咁多野，駛咁多錢．．．屋企太清貧喇！媽咪表明唔會比錢我（仲唔會支持我添，我屋企係咁），我身上得$100，真係唔夠駛，睇黎又要向第三位朋友借錢喇．．．

今日早左起身，哈哈～好少咁樣．．．自從加入左mocasting，睇多左其他人既Blog，當中小堡主既Blog用最多時間，因為我實在被果D食物相吸引住啊！！吸引程度極高，仲要係餓住咁睇，口水都要吞幾次（無計啦～要流出黎丫麻～～^^）

我雖然係為食，不過，我其實要戒口架！因為我有濕疹，所有紅肉（如牛肉）、海鮮、辛辣、燒烤、煎炸、芒果、荔枝、咖啡、一般零食（可能仲有好多）等等，通通唔食得！我只能食一D簡單、便宜既食物。所以每逢我出街食野，都要格外小心，食得肉多都會癢架！！

其實我最近呢個月D皮膚已經好好多，無乜紅，但好乾燥。可能冇返工，休息多左就會咁。

講開返工，下個月如果日日返，日日勞動，皮膚會唔會出事？希望冇啦！

25/1/2007 (四)

下午收到千色店既電話，我下個月2號有得返工喇！Yeah～呢個就係我之前賣關子既新挑戰喇．．．

做左4年幾既Office Work，一直都係坐坐坐。今個月坐得仲勁，send左咁多封求職信都冇人回，唯獨千色店先肯理我．．．「過年前」做Sales企企企，唔知會點呢？由2號「直踩」到17號，冇假放，返下午到夜晚，隨時OT得更夜，都唔緊要～幾夜都唔怕．．．至於企係邊個部門，Sale D乜，未知～到時先安排．．．如果幫手包禮物，就好lor，呵呵．．．

24/1/2007 (三)

冬眠．．．

23/1/2007 (二)

夜晚上跳舞班，最後一堂喇～竟然得10個人上堂！未試過咁少！但因為咁我搵到個好位去warm up．．．之後做壓腿，Miss今次冇幫我舉高隻腳喎，可惜．．．之後跳現代舞，我驚佢會教唔晒，好彩最後教得晒，成首「我Buy」歌既舞步終於識晒。上完堂，同Miss講拜拜，我去到Counter取聽講證書（要十蚊一張，好唔抵～）。其實，3月初有現代舞中班，都係果位Miss教，費用係$430，可惜我冇能力交．．．

凌晨時份。

唔知點解我係度係咁搵，係咁搵一D野。幾經辛苦下，終於俾我搵到佢出黎！太好喇！我不斷睇，不斷睇，我實在好驚訝，佢寫既文筆、風格，實在好好好似另一位，寫得個感受勁深之餘仲要係多產果隻（每篇唔係每日），我實在佩服萬分（要講再多次驚訝）。我從來都未見過一位咁勁既人．．．睇睇下，我竟然睇晒，睇到尾．．．最後發現，原來我要搵既野，係「遠在天邊，近在眼前」。頂～

22/1/2007 (一)

我由2/1到而家，待左21日，終於下午可以去interview，而呢份工，無論職位、時間、工作既地方、做既職責係我係「從未」做過既。唔駛要你交証明副本，唔駛要求你有咩條件經驗，肯做豬仔就得喇。相信講到呢度，大家都知係做乜啦。如果唔知都唔緊要，還掂又未正式請我，都係等電話，而且．．．有少少因素我要好好咁考慮下。遲D先話俾大家知～

夜晚返廣源中心開組，講下個4/2(日)去老人院做義工服務既程序。出席既有我、Sandy Miss, Paul, Wing, Sarah, 茵同Po Po。我地睇左D相，係D閘要油油既地方，真係好生銹．．．老人院果邊話我地最好同老人家玩下遊戲同傾下偈先至油油。咁我地諗到D遊戲，第一係傳波波（至於音樂中心會提供）；第二係老師話（Sarah會帶領～）；第三係唱歌（由我地既全男班Paul, Wing同阿龍～哈哈哈）。Sandy帶左D歌詞集，係D舊歌歌詞，我地見到有D好搞笑（唔記得係咩歌喇～），Paul同Wing仲要係細聲講，大聲笑，總之大家笑到肚痛．．．我地係咁架喇，勁鐘意講gag～

玩完呢幾樣遊戲，我地打算派禮物，打算送毛巾、餅乾同麥片。生果原本都想（例如香蕉、柑），但怕老人家有糖尿病所以揭置。到最後我地先油油。油到五點半就完，夜晚大家食飯．．．

係喎，唔記得講我果日會負責乜添！我負責做MC～哈哈～我而家有既時間，所以度MC稿唔係問題。不過．．．呢日其實我都唔知去唔去到．．．到底錢緊要，定係做義工緊要？個個都知我情況，有俾意見．．．唔該晒～

前兩、三日都send e-mail去應徵，但等到而家竟然一個feedback都冇．．．點解會咁架？唔通真係要過年後先搵到工？真係唔想lor．．．我諗如果要好快搵到工，千色店係唯一可以幫到我（唔係，係幫到我屋企），我決定下星期一親自去果度登記，就算冇得駛錢，起碼可以做一D我未做過既野啦～但如果唔請，都冇法．．．

今個月真係幾乏味．．．好想食麥記新出既咖喱豬扒包，同埋著皇，不過想下好喇．．．我其實都可以食麥記D奶昔、奶茶、甚至朱古力新地（佢果D唔係真朱古力）。麥記離我屋企真係好近，落樓下行多兩步就係．．．

呢日，幾想出街，但都唔會．．．

下星期22, 23, 25號，夜晚會出去。有兩日返中心開組，一日上跳舞班，淨係交通費都用唔少．．．我已經問左第二位朋友借錢喇～真係唔想越「滾」越大．．．

19/1/2007 (五)

繼續上網搵工、send信、其中一份係千色店，係好特別，如果有得in，有得做，都做住先。唔想屋企冇錢過年，唔想係屋企只係食豆府、食粥，份量少少果隻．．．